Hlúum betur að öldruðum!

Kæri Reykvíkingur mig langar að biðja um stuðning þinn í 4. sætið í prófkjöri Sjálfstæðismanna næstkomandi laugardag og minni á að reynsla er verðmæt og reynslan kemur ekki síst með starfsaldri og lífaldri og ég hef hvoru tveggja.

Þau ár sem að ég hef unnið fyrir borgarbúa sem varaborgarfulltrúi og í gegnum nefndarstörf mín, hef ég ávalt lagt ríka áherslu á þjónustu við aldraða, það verður að standa vörð um velferð þeirra. Kjör þessa hóps hefur versnað til muna síðustu mánuði og einnig hefur verið skorið niður í þjónustu og þeim úrræðum sem standa þessum hópi til boða. Ég mun leggja mikla áherslu á að vinna að því að fjölga úrræðum sem Reykjavíkurborg býður þessum hópi og leita leiða til þess að þjónusta við þennan hóp minnki ekki.